كي نهدر معاك حاولي تفهميني
و لي راه في قلبك غير اهدريه
انا ما قتلكش بالسيف ابغيني
قلبك من حقو يعشق لي يبغيه
انا طلبت منك غير تصارحيني و لو بخط برية ( رسالة ) وش عليه
و جوابك كيما كان يرضيني و ما يهمنيش اذا كان لالا و لا ايه
غير الكلمة تفري لي بينك و بيني
و تريحني من العذاب لي راني فيه
/
يا الغالية راكي عييتيني ... وقتاش قلب العاشق تفهميه
طبطبت و ناديت ما جاوبتيني
معرفتش علاش بابك بلعتيه ( غلقتيه )
لو صرالك ما صرالي تعذريني
انا همي غير لي ربي عالم بيه
/
محقور في عشقك حقرتيني
قلبي كان هاني و انت هولتيه
مظلوم في غرامك ظلمتيني و جميع من ظلم الدنيا دارت عليه
بريئ و بسكاتك تهمتيني ربي يحاسبك على الشي لي درتيه
درتيني عدوك و في قفصك سجنتيني
عماتك الدنيا ... عقلك و درتيه
في سجن العذاب وحدي خليتيني بلعتي الابواب و المفتاح ديتيه
/
لكن ربي كريم و قادر ينجيني و ما بقالي غير نوكل امري ليه
قادر المولا يبليك كيما بليتيني و يسجنك في القفص لي راني فيه
ما طلبتش الموحال غير حاجة تكفيني
صارحيني و لي في قلبك اهدريه
و انا لو حتى كان نعرف بلي تكرهيني
نحلف على وجهي متزيديش تشوفيه
و ما نبكيلك و ما طيح الدمعة من عيني
لو كان بكى قلبي نقلعه و نرميه
/
نبغيك نبغيك و ما نرضاش باه تذليني ... و لو نموت الذل ما نرضا بيه
انا نموت غير في القلب لي يبغيني و لي باعني دور الدنيا نشريه
انت صح طفلة شابة تعجبيني و هذا الشي لازم عليك تعرفيه
و ما تقدريش تعرفيه حتى تعرفيني
هامل في قلبي و زدتي هملتيني
الهامل لهموم لي عداها تكفيه
لا راني كي الطير في قفصك سجنتيني
لي بكيتو دمعة ربي عالم بيه
يا مقنين ( و هو العصور ) مراكش في هذا الهم وحدك
ماشي غير انت لي راك في الدنيا تعاني
حتى انا راه صرا بيا لي صرالك
لي درت فيه النية راه في سجن رماني
يا المقنين انا همي فات همك
و لو كان تعرف همي تبكي على حالي
تقدرت عليا و راني في قفص كيما قفصك
لي تمنيت فيه الخير راه رماني
يا المقنين انا ضري فات ضرك
هكذاك صابر لمكتوب الله كي بلاني
اذا انت مضرور ضرك في جناحك
انا ضري داخل في القلب دخلاني
انت لي ضلمك مهوش حبيب من حبابك
و انا الحبيب لي نحبو هو لي ظلمني
على هذا لي قتلك همي راه فات همك
و راك تعرف قيمة الحب لو كان جيت في مكاني
لو كان لي ظلمك جا حبيب قلبك
من كثرة الجراح متقدرش حتى تغني
انت مالقري ( رغم انك ) عايش وحيد في سجنك
لكن عندك حبيب يتألم معاك ثاني
عندك حبيب مرة على مرة يجي يزورك
احمد ربي متبكيش راك خير مني
يا المقنين لوكان غير جيت في مكانك
على الاقل كان نموت نموت هاني
احمد الله يا المقنين على لي عطالك
و شحال من رجال راهي في الدنيا تعاني
عايشك بحال هذا الطير في قفصك
مجروح في قلبي و محسيتيش
عايش مسجون و المفتاح في يدك
يا الظالمة علاش علاش محنيتيش
/
كل ليلة سهران مع خيالك
طول الليل ساهر و خيالك ما يفارقنيش
نشمخ ( أبلل )القلم بالدموع و نكتبلك
و نقلك حني على حالي متظلمينيش
انت لي في البنات لي قلبي حبك
و بلا بيك الحياة ظلمة في الظلام متحلاليش
غير بنظرة وحدة في قلبي عشقتك
و لو كان تعرفي قدري متخلينيش
زهيت و حوست شحال قبلك
و لو جات للزهو انت متخلعينيش
و كان كذبتيني نديك تشوفي بعينك
باش تعرفي قدري اذا متعرفينيش
ماشي الخدع هو لي جابني عندك
جابني قلبي و قلبي ما شاورنيش
/
انا و جات ليا و لاه منحبك
و منين جا الراي لقلبي ما تلومينيش
هذا شحال و انا نستنى في جوابك
بكيت و غنيت و ما جاوبتينيش
الشي لي راه مهولني هو سكاتك
علاش ديما ساكتة ما تهدريش
اذا عندك حبيب في قلبك
ماشي من حقك باش متقوليليش
قوليهالي بأي لغة نفهمك
المهم غير اتكلمي ما تسكتيش
غير كلمة تفري لي بيني و بينك
حتى كلمة لا منك متجرحنيش
الكلمة لي جات نقبلها منك
المهم كوني صادقة معايا متكذبيش
غير افهمي وش راني نهدرلك
انا راني خايف غير لو كان ما تفهمينيش
راني عايش كي الطير في قفصك
جرحي في القلب و ما حسيتيش
عايش مسجون و المفتاح في يدك
يا الظالمة علاش علاش ما حنيتيش
تاريخ التسجيل
الأحد فبراير 17, 2013 10:05 am
